domingo, dezembro 17, 2006

O País do Chocolate

Ése é en efecto Alemaña, como a miña estadía e un capítulo dos Simpsons puideron demostrar. E non só chocolate: calquer tipo de larpeirada estaba dispoñíbel por estos días nas prazas de recendo medieval, tixolo vello, de Kiel. Curiosos tenderetiños de madeira vendían champiñóns salteados, pretzels con beicon e queixo, cámemberts rebozados, biscoitos navideños de Dresde, viño quente con especias de forte hálito shakespearián, corazóns de chocolate e galleta... Nada menos que o banquete de Lúculo ou as bodas de Camacho para un larpeiro coma mín...



Mais non pensedes que as causas da miña estadía eran gastronómicas. O profesor Abuín tivo a ben convidarnos a Noel Blanco e a mín mesmo a asistir, con algúns outros galegos, vascos, estonios e franceses a un seminario internacional sobre Literatura e Cidade. Organizaba o Profesor Javier Gómez-Montero, catedrático de Línguas Románicas na Universidade Christian-Albrechts de Kiel.
Foron dúas semanas intensas que produciron unha fecunda colleita de ponencias, discusións e contactos... O percorrido polos lugares (e non-lugares) da literatura podedes contemplalo sumariamente no programa de actos.
O anecdotario é amplo, polo que iremos aos poucos. Polo momento só cronicaremos un acto á marxe do programa: o recital-xusta poética que tivo lugar o penúltimo día na Literaturhaus da cidade. Recitaba Juri Talvet, e competían varios poetas alemáns co simpatiquísimo granadino Juan Andrés García Román (libro en Hiperión) e o noso Noel Blanco Mourelle. Nunca vira un recital tan ateigado de xente...
E aconteceu o que tiña que pasar. O noso poeta, laborioso encetador de mecánicas celestes, foi coroado de loureiros, cal novo Petrarca. O profesor Victor Ferretti facía de papa Piccolomini, e todos brindamos metafóricamente con champán (xa que a non metafórica botella que se lle agasallou ao gañador fica aínda sen abrir).
Por iso, e polas festas inminentes de Nadal, Fra Vernero alza de novo a copa. E añora as dúas semanas no país do Chocolate...

5 comentários:

satine disse...

de todo quédome co chocolate, as veces é o único que me anima nestas frías tardes de inverno.

Laurindinha disse...

Que sorte ti e Noel polo país do chocolate..! Eses seminarios deberon de ser moi interesantes...!
Alédome pola coroación do poeta das mecánicas celestes!

SurOeste disse...

Vaia, vaia...e é que en cuestión de poesía algúns ben poden presumir. O da reserva da botella paréceme un coitus interrruptus. Dillo a N. da miña parte.

FraVernero disse...

Para os interesados (e xa que non os puxen ao principio porque non lembraba os tedescos nomes...), os alemáns que recitaron co noso Noel foron Daniela Zietemann e Ludger Damm. Os lectores en alemán xa teñen algo que ir anotando...

Sir Gawain disse...

Si, señor, a verdade é que foi unha bonita noite e a felicidade, como á melancólica Pentesilea de Kleist, compráceme... aínda que tampouco hai que darlle importancia... atención porque o amigo e sabio profesor xermano-arxentino Víctor Ferretti é un grande performer e recitoume/nos impecabilisimamente...

Máis ben podedes preguntarlle a Fra Vernero polas súas andanzas en bicicleta por Tübingen...

Espero que o mantenedor nos deixe colgar en breve algunhas das versións dos poemas de Ludger e Daniela que preparamos Juan Andrés e máis eu. Trátase de textos fermosos, inspirados e diversos a máis non poder.

Bicos